Fjórða færsla. Hugtök lífsins. Galdurinn.

 

Eins og Hreyfing lífsins á sér rætur í sjálfri siðmenningunni, þá eiga hugtök hennar það líka.  

Við þekkjum þau, þau eru allt um kringum okkur, þau fjalla um um rétta breytni, um siðaða  hegðun og trúna á hið góða og fallega.

Þau eru leiðsögn okkar til betra lífs, til þess sem við köllum framtíð barna okkar.

 

Öflugasta hugtakið er vopn okkar gegn ógnarvopni Óvinarins eina, Vantrúnni.  

Það er Galdur lífsins.  

Það er sú vissa að lífið muni lifa af, og það muni finna alltaf finna sér leið til þess.

Um þennan Galdur má hafa mörg orð en í sinni tærustu mynd er hann hið óþekkta í vegferð okkar.  

 

Við vitum hvert við viljum halda, hvert lokatakmark okkar er.  Að lífið lifi, fallegu lífi, góðu mannsæmandi lífi. 

Þess óskar hvert foreldri barni sínu.  Þess óskar sérhver góð manneskja.   

Og við viljum ekki að einhverjir vitleysingar hindri þá draumsýn.  Þess vegna fylkjum við okkur um Hreyfingu lífsins, um vonina, um trúna, um að við sjálf mótum framtíð okkar, framtíð barna okkar.

Galdur lífsins mun hjálpa okkur alla leið.

 

Við vitum að við eigum ekki svar við öllu, við vitum að á vegferð okkar verða margar hindranir sem virðast óyfirstíganlegar, við vitum að andstæðingur okkar, Tregðan sem öllu vill eyða, er illvígur andskoti sem fátt bítur á.  

Við vitum að við ætlum að gera eitthvað sem hefur aldrei verið gert áður, að tryggja Frið á jörð. Og gera heiminn það góðan að fólk almennt vilji tilheyra honum, en ekki eyða.  

Við vitum að við þurfum að vera það sterk að við sigrum vitleysingana, sem hafa fjármagnið, völdin, jafnvel hugarheim okkar á sínum bandi.

Við vitum að við ætlum að gera það sem jafnvel er ekki hægt, að bjarga heiminum, að bjarga manninum frá sjálfum sér.

 

Við vitum þetta allt, en okkur fallast ekki hendur, því við vitum að við eigum ekkert val.

Við eigum líf sem þarf að vernda.

Þess vegna verðum við að reyna.

Og vopn okkar er vonin, trúin og sú vissa að lífið finni sér leið til að lifa af.

 

Þess vegna vitum við að á vegferðinni mun finnast ráð, finnast lausnir, að eitt leiði að öðru, og að lokum muni þetta hafast.

Það er Galdurinn, það er Galdur lífsins.

 

Og það þarf ekki að hafa fleiri orð um hann.

Kveðja að austan.